വെണ്ടയും വഴുതനയും പിന്നെ മുളകും; മഴക്കാല പച്ചക്കറിക്കൃഷി ഉഷാറാക്കാം

വെണ്ട, വഴുതന, മുളക്, പച്ചച്ചീര, കോവല്‍, ചുരയ്ക്ക എന്നിവ ഈ സമയത്ത് നടാന്‍ അനുയോജ്യമായ ഇനങ്ങളാണ്.

By Harithakeralam

2023-06-14

മഴക്കാലത്ത് പച്ചക്കറിക്കൃഷി അല്‍പ്പം ശ്രമകരമാണ്. നല്ല ശ്രദ്ധ നല്‍കിയെങ്കില്‍ മാത്രമേ കൃഷി വിജയിക്കൂ. മഴ സീസണില്‍ വളര്‍ത്താന്‍ അനുയോജ്യമായ പച്ചക്കറി ഇനങ്ങള്‍ തെരഞ്ഞെടുത്ത് കൃഷി ചെയ്യുന്നതാകും നല്ലത്. വെണ്ട, വഴുതന, മുളക്, പച്ചച്ചീര, കോവല്‍, ചുരയ്ക്ക എന്നിവ ഈ സമയത്ത് നടാന്‍ അനുയോജ്യമായ ഇനങ്ങളാണ്.

ശ്രദ്ധിക്കണം ഇക്കാര്യങ്ങള്‍

മഴക്കാല കൃഷിക്കായി സ്ഥലം തെരഞ്ഞെടുക്കുമ്പോള്‍ പ്രത്യേകം ശ്രദ്ധിക്കണം. വെള്ളം കെട്ടിനില്‍ക്കാത്ത സ്ഥലമാണ് തെരഞ്ഞെടുക്കേണ്ടത്. അതേസമയം, സൂര്യപ്രകാശം ലഭിക്കുകയും വേണം.പയര്‍, വെണ്ട, കോവല്‍, നിത്യവഴുതന, ചുരയ്ക്ക, പച്ചച്ചീര തുടങ്ങിയവയെല്ലാം മഴക്കാലത്ത് കൃഷി ചെയ്യാന്‍ അനുയോജ്യമാണ്. മണ്ണില്‍ തടമെടുത്ത് അതില്‍  തൈകള്‍ നടുന്ന രീതി മഴക്കാലത്ത് നന്നല്ല. മണ്ണിന്റെ കൂനയൊരുക്കി അതില്‍ നടുകയാണ് ഉത്തമം. ഇങ്ങനെ ചെയ്യുമ്പോള്‍ വെള്ളം കെട്ടിനില്‍ക്കില്ല. കൂനയുടെ മുകളില്‍ കരിയില ഇടാനും ശ്രദ്ധിക്കണം, മണ്ണ് ഒലിച്ചുപോകുന്നത് തടയാനാണിത്. കീടബാധയെ തടയാനും പ്രത്യേക ശ്രദ്ധ വേണം. മഴക്കാലത്ത് സൂര്യപ്രകാശം മതിയായി ലഭിക്കാത്തതിനാല്‍ വളര്‍ച്ചയും പതുക്കെയാവും. ജൈവ കീടനാശിനികള്‍ കീടങ്ങളെ തുരത്താനായി പ്രയോഗിക്കാം.

Related News

വീട്ടുമുറ്റത്ത് ജൈവരീതിയില്‍ വാഴക്കൃഷി

കേരളത്തിന് പറ്റിയ കവുങ്ങ് ഇനങ്ങള്‍

വിളവര്‍ദ്ധനവിനും മണ്ണില്‍ ജൈവാശം നിലനിര്‍ത്താനും 15 മാര്‍ഗങ്ങള്‍

മഴയോടൊപ്പം ഉറുമ്പും ഒച്ചും; പച്ചക്കറിച്ചെടികളെ സംരക്ഷിക്കാം

1. വെണ്ട

കേരളത്തിലെ മഴക്കാലത്ത് ഏറ്റവും നന്നായി വളര്‍ത്താന്‍ കഴിയുന്ന പച്ചക്കറിയാണ് വെണ്ട. വെണ്ടയുടെ പ്രധാന ഭീഷണിയായ മഞ്ഞളിപ്പ് രോഗം പരത്തുന്ന വെള്ളീച്ചകള്‍ ഇക്കാലത്ത് തീരെ കുറവായിരിക്കും. ധാരാളം അയഡിന്‍ അടങ്ങിയ പോഷക സമൃദ്ധമായ വെണ്ടയ്ക്കക്ക് വിപണിയില്‍ നല്ല വിലയും ലഭിക്കാറുണ്ട്.

2. മുളക്

വെണ്ട കഴിഞ്ഞാല്‍ മുളകാണ് മഴക്കാല കൃഷിയിലെ പ്രധാനി. വെള്ളം കെട്ടിനില്‍ക്കാതെ ശ്രദ്ധിച്ചാല്‍ മഴക്കാലത്ത് മുളക് മികച്ച വിളവു നല്‍കും. നീരൂറ്റി കുടിക്കുന്ന പ്രാണികള്‍ മഴക്കാലത്ത് കുറവായിരിക്കുന്നതാണ് ഇതിന് കാരണം. സാധാരണ മുളകിനു പുറമേ കാന്താരി മുളകും വീട്ടില്‍ കൃഷി ചെയ്യാം. വിത്തുകള്‍ പാകിമുളപ്പിച്ച തൈകളാണ് നടേണ്ടത്. ഇതിനായി വിത്തുകള്‍ മെയ് പകുതിയോടെ തവാരണകളിലോ പ്രോട്രേകളിലോ ഇട്ട് മുളപ്പിച്ചെടുക്കാം. 20-25 ദിവസം പ്രായമായ തൈകള്‍ മാറ്റി നടണം. ചെടികള്‍ തമ്മില്‍ 45 സെ.മീറ്ററും വാരങ്ങള്‍ തമ്മില്‍ 60 സെ.മീറ്ററും ഇടയകലം നല്‍കണം. തൈകള്‍ നട്ട് അമ്പതാം ദിവസം മുതല്‍ വിളവെടുപ്പ് തുടങ്ങാം. നടുന്ന സമയത്ത് അടിവളമായി ചെടിയൊന്നിന് അരക്കിലോ ജൈവവളം നല്‍കാന്‍ മറക്കരുത്.

3. വഴുതന

മഴക്കാലത്ത് നന്നായി വിളയുന്ന മറ്റൊരു പച്ചക്കറി വഴുതനയാണ്. വിപണിയില്‍ ലഭ്യമായ നിരവധി ഇനം വിത്തുകള്‍ക്കു പുറമേ ധാരാളം നാടന്‍ വഴുതന ഇനങ്ങളും വീടുകളില്‍ കൃഷി ചെയ്തുവരുന്നു. 20 മുതല്‍ 25 ദിവസംവരെ പ്രായമായ തൈകള്‍ മാറ്റിനടാം. ചെടികള്‍ തമ്മില്‍ 60 സെന്റീ മീറ്ററും വാരങ്ങള്‍ തമ്മില്‍ 75 സെന്റീ മീറ്ററും ഇടയകലം നല്‍കണം. നീര്‍വാര്‍ച്ചയുള്ള സ്ഥലങ്ങളിലാണ് വഴുതന നന്നായി വളരുന്നത്. തവാരണകളിലും പ്രധാന സ്ഥലത്തും സ്യൂഡോമോണസിന്റെ ഉപയോഗം വാട്ടരോഗത്തെ കുറയ്ക്കും. മാറ്റിനട്ട് 40 മുതല്‍ 45 വരെ ദിവസങ്ങള്‍ക്കകം വഴുതനയുടെ വിളവെടുപ്പ് തുടങ്ങാം.