തേങ്ങയ്ക്ക് ക്ഷാമം: തമിഴ്‌നാട്ടില്‍ പൂഴ്ത്തിവയ്പ്പ്; മോശം വെളിച്ചെണ്ണയും വിപണിയില്‍

കേരളത്തില്‍ തേങ്ങ് കൂടുതലുള്ള മേഖലകളിലെത്തി തേങ്ങ സംഭരിച്ച് തമിഴ്‌നാട്ടിലേക്ക് കടത്തുകയാണ് ഈ ലോബി ചെയ്യുന്നത്.

By Harithakeralam

2025-03-28

കേരളത്തില്‍ നിന്ന് തേങ്ങ കടത്തി വെളിച്ചെണ്ണ വിപണിയില്‍ കൃത്രിമ ക്ഷാമമുണ്ടാക്കി തമിഴ്‌നാട് ലോബി. കേരളത്തില്‍ തേങ്ങ് കൂടുതലുള്ള മേഖലകളിലെത്തി തേങ്ങ സംഭരിച്ച് തമിഴ്‌നാട്ടിലേക്ക് കടത്തുകയാണ് ഈ ലോബി ചെയ്യുന്നത്. ഇതോടെ വെളിച്ചെണ്ണ വില ആറുമാസത്തിനിടെ കേരളത്തില്‍ ഇരട്ടിയായി. കൊപ്രയാക്കുന്നതിന് തമിഴ്‌നാട്ടില്‍ ചെലവ് കുറവാണ്, ഇതിനോടൊപ്പം മൂല്യവര്‍ധിത ഉത്പന്നങ്ങളും ഇവര്‍ നിര്‍മിക്കുന്നു.

അടുത്തിടെ കേരളമടക്കം ദക്ഷിണേന്ത്യന്‍ സംസ്ഥാനങ്ങളില്‍ തേങ്ങ ഉത്പാദനത്തില്‍ പകുതി ഇടിവുണ്ടായി എന്നാണ് കണക്കുകള്‍ സൂചിപ്പിക്കുന്നത്. കാറ്റുവീഴ്ച, മണ്ഡരി തുടങ്ങിയ രോഗങ്ങള്‍ വലിയ പ്രശ്‌നങ്ങളാണ് സൃഷ്ടിക്കുന്നത്. കേരളത്തില്‍ ഓരോ വര്‍ഷവും തെങ്ങിന്‍ തോട്ടങ്ങളുടെ വിസ്തൃതി കുറഞ്ഞു വരികയാണ്. കാലാവസ്ഥ വ്യതിയാനം, വരള്‍ച്ച, വന്യമൃഗ ശല്യം എന്നിവയെല്ലാം തെങ്ങിന്റെ നാടായ കേരളത്തിന്റെ പൈതൃകത്തിന് തിരിച്ചടിയായി. സര്‍ക്കാറിന്റെയും കൃഷി വകുപ്പിന്റെയും നിസഹകരണം കൂടിയായതോടെ കര്‍ഷകര്‍ ദുരിതത്തിലുമാണ്. ഇതിനാല്‍ വില കൂടിയതിന്റെ ഗുണമൊന്നും നമ്മുടെ കര്‍ഷകര്‍ക്ക് ലഭിക്കുന്നില്ല.

Related News

ഡിജിറ്റല്‍ ആസക്തി തടയാന്‍ പൊലീസ്: രക്ഷിച്ചത് 1700 കുട്ടികളെ

പരിപൂര്‍ണ ആരോഗ്യത്തിനായി 'വിയ ' മേയ്ത്രയില്‍ ആരംഭിച്ചു

ഒട്ടു മാവിന്‍ തൈകളില്‍ കൊമ്പ് ഉണക്കം

വെറും വയറ്റില്‍ ജീരക വെള്ളം കുടിക്കൂ; ഗുണങ്ങള്‍ നിരവധിയാണ്

വെളിച്ചെണ്ണ 300 രൂപയ്ക്ക് അടുത്താണിപ്പോള്‍. ആറുമാസം കൊണ്ട് ഇരട്ടിയിലധികം വില വര്‍ധിച്ചു. കൊപ്ര വില 180 രൂപയിലെത്തിയിരിക്കുന്നു. ഇതിനാല്‍ തമിഴ്‌നാട്ടിലെയും കര്‍ണാടകയിലെയും വ്യാപാരികള്‍ കൊപ്രയും വെളിച്ചെണ്ണയും പൂഴ്ത്തിവച്ച് വിലക്കയറ്റം സൃഷ്ടിക്കുകയാണ്. സാഹചര്യം ഇതായതിനാല്‍ ഉത്തരേന്ത്യയില്‍ നിന്നുള്ള കച്ചവടക്കാരും വിപണിയില്‍ ഇടപെടുന്നില്ല. കേരളത്തിലെ ചെറുകിട വെളിച്ചെണ്ണ മില്ലുകള്‍ ഇതുമൂലം വലിയ പ്രതിസന്ധിയാണ് നേരിടുന്നത്.

വിലക്കയറ്റവും ക്ഷാമവും കാരണം ഗുണനിലവാരം കുറഞ്ഞ വെളിച്ചെണ്ണയും വിപണിയില്‍ എത്തുന്നുണ്ട്. വന്‍ തോതില്‍ പിണ്ണാക്ക് ഇറക്കുമതി ചെയ്ത് ഇതില്‍ നിന്നും എണ്ണയുണ്ടാക്കി വില്‍ക്കുന്ന സംഘവുമിപ്പോള്‍ സജീവമാണ്, വിലയും ഗുണനിലവാരവും കുറഞ്ഞ ഇത്തരം എണ്ണകള്‍ ഹോട്ടലുകളും തട്ടുകടക്കാരുമൊക്കെയാണ് ഉപയോഗിക്കുന്നത്. ആരോഗ്യത്തിന് വലിയ രീതിയില്‍ ഇവ പ്രശ്‌നം സൃഷ്ടിക്കുമെന്നാണ് ആരോഗ്യരംഗത്തുള്ളവര്‍ പറയുന്നത്.